ညက ယှဉ်ပြိုင်ကစားခဲ့တဲ့ ယူရိုပါလိဂ် ဗိုလ်လုပွဲ မှာတော့ တော့တင်ဟမ်ဟော့စပါးက မန်ချက်စတာယူနိုက်တက်ကို ဘရန်နန် ဂျွန်ဆင်ရဲ့ တစ်လုံးတည်းသော သွင်းဂိုးနဲ့ အနိုင်ရသွားခဲ့ပါတယ်။ ဒါကြောင့် တော့တင်ဟမ်ဟော့စပါးဟာ ၁၇ နှစ်ကြာ ဖလား လက်မဲ့ ဖြစ်နေမှုကို အဆုံးသတ်နိုင်ခဲ့သလို ယူရိုပါလိဂ် မှာလည်း ၃ ကြိမ်မြောက် အဖြစ် ချန်ပီယံ ဖြစ်သွားခဲ့ပါတယ်။
ဒီပွဲမှာ နှစ်သင်းစလုံးရဲ့ ခြေစွမ်းပိုင်းတွေနဲ့ ပတ်သတ်လို့ အထွေအထူး ပြောစရာ မရှိခဲ့ပါဘူး။ ရှုံးပွဲတွေ ဆက်နေပြီး ပရီးမီးယားလိဂ် ဇယား အောက်ခြေမှာ ရှိနေတဲ့ အသင်း နှစ်သင်းရဲ့ လိုအပ်ချက်တွေ များခဲ့တဲ့ အားပြိုင်ပွဲ အဖြစ်ပဲ မြင်တွေ့ခဲ့ရပါတယ်။ နှစ်သင်းပေါင်း ဂိုးပေါက် ကန်ချက် ၁၉ ကြိမ်သာ ရှိခဲ့သလို ဒီထဲမှာမှ စပါးဟာ ဂိုးပေါက် ကန်ချက် ၃ ကြိမ်၊ ဂိုးပေါက် တည့်မှု ၁ ကြိမ် ကနေ အဖိုးတန် အနိုင်ဂိုး ၁ ဂိုး ရခဲ့တာ ဖြစ်ပါတယ်။ ပြောရမယ် ဆိုရင် ဘရန်နန် ဂျွန်ဆင်ရဲ့ သွင်းဂိုးက လုံးဝ မလှပခဲ့ပေမယ့် စပါး ပရိသတ်တွေ အတွက် ကတော့ မျက်လုံးထဲက မထွက်မယ့် အလှပဆုံး သွင်းဂိုးမျိုး ဖြစ်နေမှာ သေချာပါတယ်။
ခြေစွမ်းပိုင်း အားရစရာ မရှိကြတဲ့ကြားကပဲ နှစ်သင်းစလုံး အစွမ်းကုန် အားထည့် ကစားသွားခဲ့တာ ကိုတော့ ချီးကျူးရပါမယ်။ စပါးဟာ ယူရိုပါလိဂ်မှာ ခံစစ်ပိုင်း အားပြု ကစားတတ်တဲ့ အသင်းပီပီ ဒီနေ့ပွဲ မှာလည်း ဘောလုံးပိုင်ဆိုင်မှု ၂၇ ရာခိုင်နှုန်းပဲ ရှိခဲ့ပြီး ယူနိုက်တက်ရဲ့ တိုက်စစ်ကို ထူးရှယ် ကြံ့ကြံ့ခံကာ ရင်ဆိုင်ခဲ့တာ တွေ့ရပါတယ်။ ထုံးစံ အတိုင်း ယူနိုက်တက်ရဲ့ ကစားပုံ ကတော့ ဟိုမရောက်၊ သည်မရောက်နဲ့ ဇာတ်မြောကြီးပဲ ဖြစ်ခဲ့ပြန်တာပါ။ မေဆန်မောင့်နဲ့ ဟွိုက်ဂျ်လန်း နေရာကို ဂါနာချိုနဲ့ ဇီယက်ခ်ဇီး တို့ ဝင်လာမှသာ ယူနိုက်တက်ရဲ့ တိုက်စစ် လမ်းကြောင်းတွေ ပိုပွင့်သွားခဲ့ပြီး စပါး ခံစစ်ကို ထိထိရောက်ရောက် ခြိမ်းခြောက်လာနိုင်ခဲ့တာ ဖြစ်ပါတယ်။ ဟွိုက်ဂျ်လန်းရဲ့ ခေါင်းတိုက်ချက်ကို ဗန်ဒီဗန် ဂိုးစည်းပေါ် ကနေ ရှင်းထုတ်လိုက်နိုင်တာ ကလည်း ယူနိုက်တက် အတွက် ကံဆိုးခဲ့ရပါတယ်။ အမော်ရင် အနေနဲ့ တိုက်စစ် အတွက် ပိုထိရောက်ပြီး ပရိသတ် အကြိုက် ဂါနာချိုနဲ့ ဇီယက်ခ်ဇီးကို မသုံးပဲ လေးကန်နေတဲ့ ဟွိုက်ဂျ်လန်း ကိုပဲ ဘာကြောင့် ပွဲထုတ်နေသလဲ ဆိုတာ စဉ်းစားစရာပါ။ တကယ်တမ်း ဒီနှစ်ယောက်သာ ပထမလူစာရင်းမှာ ပါဝင်နိုင်ခဲ့ရင် ပွဲရလဒ်လည်း တစ်မျိုးတဖုံ ပြောင်းလဲသွားမှာပါ။
ဘာပဲ ပြောပြော စပါး အနေနဲ့ ယူနိုက်တက်ကို ပါးပါးနပ်နပ် ကစားပြီး ယူရိုပါလိဂ် ချန်ပီယံဆုကို ရယူသွားနိုင်ခဲ့ပါပြီ။ နည်းပြ အန်ဂျီ ပိုစတီကိုဂလူး အနေနဲ့လည်း ဒုတိယမြောက် ရာသီရောက်တိုင်း ဖလား ရယူနိုင်လေ့ ရှိတဲ့ အစဉ်အလာကို ဆက်လက် ထိန်းသိမ်းသွားနိုင်ခဲ့ပါတယ်။ စပါးဟာ ဒီနိုင်ပွဲကြောင့် ပရီးမီးယားလိဂ်မှာ အဆင့် ၁၇ နေရာကို ရောက်နေသည့် တိုင်အောင် ချန်ပီယံလိဂ် ဝင်ခွင့် ရရှိသွားခဲ့သလို မြောက်လန်ဒန် ပြိုင်ဘက်ကိုလည်း ထပ်ပြီး အသားစီးရယူနိုင်ခဲ့လို့ အမြတ်ထွက်ခဲ့တယ်လို့ ဆိုရမှာပါ။ အသင်းခေါင်းဆောင် ကိုရီးယားသား ဆွန်ဟောင်မင် အတွက်လည်း သူ့ဘော်ဒါကြီး ဟယ်ရီကိန်း လိုပဲ ဆုဖလား အရယူနိုင်ခဲ့ပြီး သမိုင်းတစ်လျှောက် အာရှသား တစ်ဦး ဦးဆောင်တဲ့ အသင်းက ဥရောပ ချန်ပီယံဆု ရရှိခဲ့တဲ့ စံချိန်ကောင်း ကိုလည်း ပိုင်ဆိုင်ခဲ့ပါတယ်။
အဆိုးရွားဆုံး ဘောလုံးရာသီ တစ်ခုကို ဆုဖလား အောင်မြင်မှုနဲ့ ပိတ်သိမ်းနိုင်ဖို့၊ လာမယ့်နှစ် ချန်ပီယံလိဂ် ဝင်ခွင့် ရရှိဖို့၊ ဘဏ္ဍာရေးအရလည်း အထောက်အကူ ဖြစ်နိုင်ဖို့နဲ့ ကစားသမားကောင်းတွေ ခေါ်ယူနိုင်ဖို့ စတာတွေ အတွက် အရေးကြီးတဲ့ ပွဲစဉ် တစ်ပွဲ ဖြစ်ခဲ့တာပါ။ အခု လက်ရှိ မှာတော့ ဒီအခြေအနေတွေ အားလုံးကို စပါးက ထိုက်ထိုက်တန်တန် သိမ်းပိုက်သွားခဲ့ပါပြီ။ တစ်ဖက်မှာလည်း ဒီအခြေအနေတွေ အားလုံးကို လက်လွှတ် ဆုံးရှုံးလိုက်ရတဲ့ ယူနိုက်တက် အတွက်တော့ အဆိုးရွားဆုံး အမှောင်မိုက်ဆုံး ဘောလုံး ရာသီ ဖြစ်သွားခဲ့သလို လာမယ့် ရာသီ အတွက်လည်း မျှော်လင့်ချက်မဲ့သွားခဲ့ပြီ ဖြစ်ပါတယ်။ ယူနိုက်တက်ဟာ ယူရိုပါလိဂ်မှာ ချန်ပီယံ ဖြစ်အောင် ကြိုးစားပြီး ချန်ပီယံလိဂ် ဝင်ခွင့် အရယူဖို့ အားခဲ့ထားခဲ့တာပါ။ နောက်ဆက်တွဲ အနေနဲ့ ချန်ပီယံလိဂ် ဝင်ခွင့်ရမှ ပြောင်းလာမယ် ဆိုတဲ့ ထိပ်တန်း ကစားသမားတွေ ကိုပါ စွဲဆောင်နိုင်ဖို့ မျှော်လင့်ခဲ့တာ ဖြစ်ပါတယ်။ အခုတော့ ယူနိုက်တက်ဟာ နောက်ရာသီ တစ်ပတ် တစ်ပွဲသာ ကန်ရမယ့် ပရီးမီးယားလိဂ်မှာ ရလဒ်ကောင်းဖို့သာ မျှော်လင့်ရတော့မှာ ဖြစ်သလို အလယ်အလတ် အဆင့် ရှိတဲ့ ကစားသမားတွေနဲ့ အသင်းကို ဖြည်းဖြည်းချင်း ပြန်လည် တည်ဆောက်ရတော့မှာ ဖြစ်ပါတယ်။ (ချွင်းချက် အနေနဲ့ ယူနိုက်တက် ဖြစ်လို့ ပြောင်းလာချင်တယ် ဆိုတဲ့ ကစားသမားတွေ ရှိနေရင်တော့ တမျိုး ဖြစ်နိုင်ပါတယ်။) အခု လောလောဆယ်တော့ ယူနိုက်တက်တို့ သမိုင်းတစ်လျှောက် အဆိုးရွားဆုံး ရာသီတွေထဲက တစ်ခု အဖြစ် မှောင်မိုက်စွာနဲ့ အဆုံးသတ်ရင်း မျှော်လင့်ချက်မဲ့တဲ့ ရာသီသစ်ကို စောင့်မျှော်နေရတော့မှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
