ဗစ်တင်ညာရဲ့ ဟက်ထရစ်နဲ့ စပါးကို အနိုင်ယူခဲ့တဲ့ ပီအက်စ်ဂျီ

ဒီကနေ့ ညက ကစားသွားတဲ့ နောက်ထပ် ချန်ပီယံလိဂ် ပွဲစဉ် တစ်ပွဲ မှာတော့ ပီအက်စ်ဂျီက တော့တင်ဟမ်ဟော့စပါးကို ၅-၃ ရလဒ်နဲ့ အနိုင်ရသွားခဲ့ပါတယ်။ ပီအက်စ်ဂျီ အနေနဲ့ စပါးကို ခက်ခက်ခဲခဲ ကစားပြီး အပြန်အလှန် ဂိုးတွေ သွင်းယူခဲ့ရကာ ကွင်းလယ်လူ ဗစ်တင်ညာ အနေနဲ့လည်း သူ့ရဲ့ ပထမဦးဆုံး ဟက်ထရစ်ကို ရရှိသွားခဲ့ပါတယ်။

ဒီနေ့ပွဲမှာ ပီအက်စ်ဂျီ ဘက်က ဟာကီမီနဲ့ ဒူရေး တို့က လွဲလို့ လူစုံခဲ့ပေမယ့် နည်းပြ အန်နရီကေးက ဒမ်ဘီလီကို အရန်ခုံ ပို့ထားခဲ့ပါတယ်။ အန်ဂျန်တူကို တိုက်စစ်မှာ ဦးဆောင်စေခဲ့ပြီး ဘာကိုလာ၊ ခါဗရာစခီလီယာ တို့နဲ့ ဝန်းရံကာ ကွင်းလယ်မှာ ဗစ်တင်ညာ၊ ယာအို နီးဗက်စ်၊ ဖေဘီယန် ရူအစ်ဇ် တို့ကို တွဲဖက်ပေးခဲ့ပါတယ်။ ခံစစ် မှာတော့ ပါချို၊ မာကွင်ညော့စ်၊ မန်းဒက်စ်၊ ဇိုင်း အမ်မရီ၊ ချီဗာလီယာ တို့ ပွဲထွက်ခဲ့ပါတယ်။ စပါး ကတော့ ၄-၄-၂ အခင်းအကျင်းနဲ့ ပီအက်စ်ဂျီကို ရင်ဆိုင်သွားခဲ့ပြီး သောမက်စ် ဖရန့်ခ် အနေနဲ့ အာဆင်နယ်နဲ့ ပွဲက လူစာရင်းကို သိသိသာသာ အပြောင်းအလဲ လုပ်ခဲ့တာ တွေ့ရပါတယ်။

ဧည့်သည် စပါးက ရစ်ချာလီဆင်ရဲ့ ခေါင်းတိုက်ဂိုးနဲ့ ဦးဆောင်နိုင်ခဲ့ပေမယ့် ပထမပိုင်း အပြီးမှာ ဗစ်တင်ညာက ချေပဂိုး ပြန်လည် သွင်းယူပေးခဲ့တာကြောင့် ၁-၁ ရလဒ် ထွက်ပေါ်နေခဲ့ပါတယ်။ ဒုတိယပိုင်း မှာတော့ သွင်းဂိုးတွေ ထပ်မံ မြင်တွေ့ခဲ့ရပြီး ကိုလို မူအာနီက စပါး အတွက် ဦးဆောင်ဂိုး ထပ်မံ သွင်းယူပေးခဲ့ပါတယ်။ အဲဒီနောက် မှာတော့ အိမ်ရှင်အသင်းက တိုက်စစ်မြှင့်ခဲ့ပြီး ပွဲချိန် ၅၃ မိနစ်မှာ ဗစ်တင်ညာ၊ ၅၉ မိနစ်မှာ ဖေဘီယန် ရူအစ်ဇ်၊ ၆၅ မိနစ်မှာ ပါချို တို့က ဂိုးတွေ ဆက်တိုက် သွင်းယူခဲ့လို့ ပီအက်စ်ဂျီက ၄-၂ နဲ့ ဦးဆောင်နိုင်ခဲ့ပါတယ်။ အဲဒီနောက် စပါး အတွက် တတိယမြောက် ဂိုးကို ကိုလို မူအာနီက သွင်းယူခဲ့ပြီး အမှီလိုက်ဖို့ ကြိုးစားခဲ့ပေမယ့် ၇၆ မိနစ် မှာတော့ ဗစ်တင်ညာက ပင်နယ်တီ ကနေ ပီအက်စ်ဂျီ အတွက် အနိုင်သေချာစေမယ့် ဂိုးကို သွင်းယူခဲ့တာကြောင့် စပါးတို့ ဘာမှ မတတ်နိုင်တော့ပဲ ၅-၃ ရလဒ်နဲ့ ရှုံးနိမ့်သွားခဲ့ပါတယ်။